रेडकू वाचविण्यासाठी गेलेला 20 वर्षीय युवक उरमोडी कॅनाॅलमध्ये बुडाला
सातारा | जिल्ह्यातील आर्वी (ता. कोरेगाव) येथे कॅनॉलच्या वाहत्या पाण्यात पडलेले रेडकू वाचवण्याच्या प्रयत्न करणाऱ्या 20 वर्षीय युवकाचा बुडून मृत्यू झाला. प्रशांत लक्ष्मण दळवी असे या युवकाचे नाव असून बेपत्ता झालेल्या युवकाचा तब्बल दीड दिवसांनी मृतदेह आढळून आला. स्वतः चा जीव धोक्यात घालून आपल्या रेडकाला वाचविण्यासाठी गेलेल्या प्रशांतच्या मृत्यूमुळे परिसरातून हळहळ व्यक्त होत आहे.
याबाबतची अधिक माहिती अशी, आर्वी येथील प्रशांत लक्ष्मण दळवी हा शुक्रवारी गुरं चरण्यासाठी श्री बाळोबाच्या खिंडीकडे गेला होता. दुपारी एक वाजण्याच्या सुमारास उरमोडी कॅनॉलच्या वाहत्या पाण्यात रेडकू पडले. कॅनॉल मधील वाहत्या पाण्यात रेडकू वाहून जात असताना त्याला वाचवण्यासाठी तो कॅनॉलच्या कडेने रडत- रडत पळत असल्याचे काही नागरिकांनी पाहिले. यावेळी उतारा वरून वाहणाऱ्या पाण्याला प्रचंड वेग असल्यामुळे कॅनॉलमध्ये उतरू नकोस असंही त्याला लोकांनी सांगितले. याबाबतची माहिती त्याचे वडील लक्ष्मण जगन्नाथ दळवी यांना समजली, तात्काळ सर्व दळवी परिवार गावातील ग्रामस्थ व युवा वर्गाने कॅनॉलवर शोध सुरु केला. काही अंतरावर कॅनॉलच्या कडेला त्याच्या दैनंदिन वापरातील चप्पल, टॉवेल, छत्री, डबा, पिशवी अस साहित्य मिळून आले. सर्व जणं शोध घेत पुढे गेले असता आर्वी- कोंबडवाडी हद्दीत असलेल्या तलावानजीक पाण्यात वाहून आलेले रेडकू जखमी झालेल्या अवस्थेत मिळून आले. मात्र प्रशांत दळवी मिळून आला नाही.
दुपारी सुरू झालेली शोधून मोहीम रात्री उशिरापर्यंत सुरू होती. दरम्यान कॅनॉल मधील पाण्याला गती असल्यामुळे शोधकार्य शुक्रवारी रात्री थांबविण्यात आले. उरमोडी कॅनॉल प्रशासनाला पाणी बंद करण्याची ग्रामस्थांनी विनंती केली. शनिवारी सकाळपासून रात्रीपर्यंत ग्रामस्थांनी बेपत्ता असलेल्या प्रशांत दळवीची कॅनॉल व तलाव पात्रात शोध मोहीम राबविली. मात्र, त्यात यश आले नाही . घटनास्थळी रहिमतपूर पोलीस ठाण्याचे सपोनि गणेश कड यांनी भेट दिली. अखेर रविवारी सकाळी कॅनाॅलमधील पाणी कमी झाल्याने प्रशांत दळवी यांचा मृतदेह आढळून आला.
तलाठी, मंडलाधिकारी ढिम्म
दरम्यान आर्वी येथील नागरिकांनी जिल्हा आपत्ती व्यवस्थापन विभागाला या घटनेची माहिती दिली. मात्र, दिवसभर महसूल विभागातल्या तलाठी, मंडलाधिकारी यांनी रेस्क्यू पथक न पाठवता केवळ विचारपूस करण्यापलीकडे काहीच मदत केली नाही.
