बनावट दारू अड्ड्यावर छापा 5 जणांना अटक : सातारा, कराड भरारी पथकाची कारवाई
कराड | उत्पादन शुल्क विभागाच्या सातारा आणि कराड कार्यालयाच्या भरारी पथकाने बनावट दारू तयार करुन त्याची विक्री करणाऱ्या अड्ड्यांवर छापा टाकून पाचजणांना ताब्यात घेतले. विविध ठिकाणी केलेल्या कारवाईत 19 लाख 12 हजार रुपयांचा मुद्देमाल जप्त करण्यात आला. या कारवाईत रोहित रमेश सोळवंडे (वय- 26, रा. कुंडल, ता. पलूस, जि. सांगली), फैय्याज मुसा मुल्ला (वय- 53, रा. मलकापूर), शेखर गुणवंत बनसोडे (वय-50), आयाज अबू मुल्ला (वय-53), इर्शाद उर्फ बारक्या शहाबुद्दीन मुल्ला (वय- 34, सर्वजण रा. रेठरे बुद्रूक, ता. कराड) अशी उत्पादन शुल्क विभागाने ताब्यात घेतलेल्यांची नावे आहेत.
याबाबतची अधिक माहिती अशी, भरारी पथकाने रविवारी दुपारी जुळेवाडी गावच्या हद्दीत रोहित सोळवंडे याला ताब्यात घेऊन त्याच्याकडील बनावट देशी दारूचा साठा व चारचाकी वाहन जप्त केले. सोळंवडे यांच्याकडे अधिक चौकशी केली असता जुळेवाडीत एका देशी दारू दुकानाच्या पाठीमागे दारू तयार केली जात असल्याचे उघडकीस आले. त्यानुसार उत्पादन शुल्क विभागाने छापा टाकून फैय्याज मुल्ला आणि शेखर बनसोडे यांना ताब्यात घेत त्यांच्याकडूनही बनावट दारूचा साठा आणि चारचाकी वाहन जप्त केले. त्यानंतर मलकापूर येथे एका हॉटेलच्या पाठीमागे तसेच रेठरे बुद्रूक येथील चौकी परिसरातील मुलाणकी नावच्या शिवारात छापे टाकून आयाज मुल्ला आणि इर्शाद उर्फ बारक्या मुल्ला या दोघांना ताब्यात घेण्यात आले. त्यांच्याकडून बनावट दारूचा साठा तसेच दारू निर्मितीसाठी लागणारे साहित्य, मशीन, बनावट लेबल, बनावट बूच यासह इतर साहित्य जप्त करण्यात आले. चार ठिकाणी केलेल्या कारवाईत एकूण 19 लाख 12 हजार रुपये किमतीचा मुद्देमाल जप्त करण्यात आला. तसेच पाचजणांना अटक करण्यात आले.
दरम्यान, जुळेवाडी येथील देशी दारू दुकान मालक संबंधित दुकानातून बनावट दारूची विक्री करीत असल्याचे निदर्शनास आल्यामुळे संबंधित दुकानावरही विभागीय गुन्हा नोंद करण्यात आला आहे. उत्पादन शुल्कचे निरीक्षक माधव चव्हाण, संजय साळवे, दुय्यम निरीक्षक किशोर नडे, शरद नरळे, प्रशांत नागरगोजे, सहाय्यक दुय्यम निरीक्षक नितीन जाधव, महेश मोहिते, सागर आवळे, मनीष माने, भीमराव माळी, अजित रसाळ, आबासाहेब जानकर यांच्यासह कर्मचाऱ्यांनी सहभाग घेतला.
