कराड | जखिणवाडी येथील मेंढवडा- धनगरवाडा परिसरातील विहिरीत बिबट्याचे दोन बछडांना पडल्याची घटना शनिवारी सकाळी उघडकीस आली. विहीर मालक सुखदेव येडगे यांच्यासह ग्रामस्थांच्या हा प्रकार लक्षात आल्यानंतर त्यांनी वनविभागाला तातडीने याची माहिती दिली. दरम्यान, विहिरीत पडलेले बिबट्याचे बछडे विहिरीत जीव वाचविण्यासाठी बराचवेळ धडपड करत होते. अखेर वनविभागाच्या पथकाने रेस्क्यू ऑपरेशन राबवत लोखंडी पिंजऱ्याच्या मदतीने दुपारी एक वाजण्याच्या सुमारास बछड्यांना विहिरीतून बाहेर काढण्यात यश मिळवले.
घटनास्थळावरून व वनविभागाने दिलेली माहिती अशी, जखिणवाडी येथील सुखदेव येडगे यांच्या मालकीच्या विहीरीला कठडे बांधलेले आहेत, परंतु एका बाजूने माती निघाली असून तेथून बिबट्याचे बछडे विहीरीत पडल्याचा अंदाज व्यक्त केला जात आहे. याबाबतची माहिती सकाळी 10 वाजता वनविभागाला मिळाली होती. त्यानंतर जवळपास दोन तासाच्या परिश्रमानंतर बछड्यांना वाचविण्यात वनविभागाला यश आले. सध्या दोन्ही बछडे वनविभागाच्या ताब्यात असून सुखरूप आहेत. आता बछड्यांची आणि मादी बिबट्याची भेट घडवण्यासाठी प्रयत्न करणार असल्याचे वन विभागाचे वनक्षेत्रपाल तुषार नवले यांनी सांगितले.
रेस्क्यू मोहिमेत कराड वनविभागाचे वनक्षेत्रपाल तुषार नवले, मलकापूर वनपाल आनंदा जगताप, वनरक्षक कैलास सानप, सचिन खंडागळे, अरविंद जाधव, वाहन चालक योगेश बेडेकर, वनसेवक भरत पवार , अमोल माने, धनाजी गावडे, हनुमंत मिठारे, भाऊसो नलवडे, शशिकांत जाधव, प्राणीमित्र अजय महाडीक, उदित कांबळे, रोहीत कुलकर्णी, गणेश काळे, मयुर लोहाना आदींनी सहभाग घेतला होता.
