पर्यटकांनो सावधान ! कास परिसरातील एकीव धबधब्यात पडून दोन युवकांचा मृत्यू

सातारा | सातारा जिल्ह्यातील जावली तालुक्यामधील जगप्रसिद्ध पर्यटनस्थळ असलेल्या कास परिसरातील एकिव धबधब्याच्या कड्यावरून दोन तरुण 700 ते 800 फूट खोल दरीत कोसळले. या घटनेत दोघा युवकांचाही मृत्यू झाला आहे. ही घटना सायंकाळी सहा वाजण्याच्या सुमारास घडली. पाऊस व अंधारामुळे त्यांच्यापर्यंत पोहोचण्यास पावसामुळे अडथळे येत होते. हे दोन तरुण सातारा तालुक्यातील बसप्पाचीवाडी व करंजे पेठ येथील असून अक्षय आंबवले व गणेश फडतरे अशी त्यांची नावे असल्याची प्राथमिक माहिती मिळत आहे.

याबाबत घटनास्थळ व पोलिसांकडून मिळालेल्या माहितीनुसार, आज सुट्टीचा वार रविवार असल्याने जावळी तालुक्यातील एकीव धबधब्यावर आज फिरण्यासाठी चार युवक आले होते. त्यावेळी ते मद्यधुंद अवस्थेत होते. या अवस्थेतच त्यांच्यात भांडणे झाल्याचे स्थानिक ग्रामस्थांनी सांगितले. भांडण सुरू असतानाच मुख्य धबधब्याच्या खालच्या बाजूला गेले असता दोघेजण 700 ते 800 फूट खोल दरीत कोसळले. रात्रीची वेळ, मुसळधार पाऊस व अवघड जागा असल्यामुळे घटनास्थळी मदत कार्य करण्यास व त्यांच्यापर्यंत पोहचण्यास अडचणी येत होत्या. रात्री उशिरा या दोघा युवकांपर्यंत पोहोचण्यास रेस्क्यू टीमला यश आले आहे. त्यांना दोन्ही तरुणांचे मृतदेह सापडले असून ते वर काढण्याचे काम सुरू होते. अंधार आणि पावसामुळे मदत कार्यात अडचणी निर्माण होत आहेत. कड्यावरून दरीत पडलेले युवक एक बसाप्पाचीवाडी व एक सातारा करंजे येथील असल्याची माहिती समोर येत आहे, अशी माहिती मेढा पोलीस ठाण्याचे सहाय्यक पोलीस निरीक्षक संतोष तासगावकर यांनी दिली.

या घटनेची माहिती मिळताच मेढा पोलीस ठाण्याचे सहाय्यक पोलीस निरीक्षक संतोष तासगावकर व कर्मचारी घटनास्थळी दाखल झाले आहेत. साताऱ्यातून शिवेंद्रसिंहराजे रेस्क्यू टीम व महाबळेश्वर टेकर्सचे जवानही घटनास्थळी मदत कार्यासाठी पोहोचले असून बचाव कार्य सुरू आहे. पावसाळी पर्यटनात कास परिसरातील या निसर्गरम्य परिसराला हजारो पर्यटक भेट देत असतात. त्यातच हुल्लडबाज तरुणांकडून दृश्यकृत्य सुरू असतात. यात एकीव धबधब्यावर तरुणांची नेहमीच हुल्लडबाजी होत असल्याने शनिवार व रविवार पोलीस बंदोबस्त ठेवावा, अशी मागणी येथील स्थानिक ग्रामस्थ व पर्यटकप्रेमी करत आहेत.