महामार्गावर ऊसाच्या ट्रॅक्टरला ट्रकची धडक : महिला ठार, 4 जखमी
कराड | पुणे- बेंगलोर आशियाई महामार्गावर वराडे (ता. कराड) गावचे हद्दीवर भराव पुलावर ऊस वाहतूक करणाऱ्या ट्रॅक्टरला पाठीमागून येणाऱ्या ट्रकने धडक दिल्याने झालेल्या अपघातात ऊसतोड कामगार महिला ठार झाली. तर ट्रॅक्टरमधील अन्य चौघेजण जखमी झाले आहेत. सकाळी 11.30 वाजण्याच्या सुमारास ही घटना घडली. तुळसाबाई बाबासाहेब हाळणावर (रा. मोहरी, जि. अहमदनगर) असे अपघातात ठार झालेल्या वृद्ध ऊसतोड कामगार महिलेचे नाव आहे. या घटनेची नोंद तळबीड पोलीस ठाण्यात झाले आहे.
याबाबत घटनास्थळ व पोलिसांकडून मिळालेली माहिती अशी की, उंब्रज गटातील साबळवाडी येथून रविवारी सकाळी ऊसतोडणी करून हाळवणकर कुटुंबिय सकाळी साडेअकरा वाजण्याच्या सुमारास ऊसाचा ट्रॅक्टर घेवून सह्याद्री सहकारी साखर कारखाना येथे निघाले होते. वराडे गावच्या हद्दीत भराव पुलावर पाठीमागून येणाऱ्या ट्रकने उसाने भरलेल्या ट्रॅक्टरला धडक दिल्याने ट्रॅक्टर चालकाचे नियंत्रण सुटून उसाचा ट्रॅक्टर भराव पुलावर रस्त्याकडेला पलटी झाला. या ट्रॅक्टरमधून पडल्याने तुळसाबाई हाळणावर यांना गंभीर मार लागला. जखमी अवस्थेत त्यांना उपचारासाठी कराड येथील कृष्णा रुग्णालयात दाखल करण्यात आले होते. मात्र उपचारापूर्वीच त्यांचा मृत्यू झाला असल्याचे डॉक्टरांकडून सांगण्यात आले.
या अपघातात ट्रॅक्टर चालक, त्याचा भाऊ व अन्य दोन जण किरकोळ जखमी झाले आहेत. वराडे ग्रामस्थांनी घटनास्थळी धाव घेऊन मदतकार्य केले. दरम्यान अपघातात नंतर उसाची गाडी भराव पुलावर पलटी झाली होती. दुपारी कारखाना व्यवस्थापनाने सदरचा ऊस अन्य वाहनात भरून तो कारखान्याकडे रवाना केला आहे.
