कराड नगरपरिषदेला 2 कोटी रुपयांची अत्याधुनिक स्वच्छता व अग्निशमन वाहने 

कराड (हॅलो न्यूज) –  कराड शहराच्या सर्वांगीण विकासासाठी सातत्याने प्रयत्नशील असलेले लोकनियुक्त नगराध्यक्ष राजेंद्रसिंह यादव यांच्या सातत्यपूर्ण पाठपुराव्यामुळे तसेच शंभूराज देसाई यांच्या मार्गदर्शनाखाली कराड नगरपरिषदेला सुमारे 2 कोटी रुपयांची अत्याधुनिक स्वच्छता व अग्निशमन वाहने प्राप्त झाली आहेत. कराड शहराच्या नागरी सुविधा अधिक सक्षम, आधुनिक आणि कार्यक्षम करण्याच्या दृष्टीने महत्त्वपूर्ण उपलब्धी असून, शहराच्या विकासात मोलाची भर घालणारी ठरणार आहे. यावेळी नगराध्यध्यक्ष राजेंद्रसिंह यादव, उपनगराध्यक्ष पोपटराव साळुंखे, विरोधी पक्षनेते विजय वाटेगावकर, नगरसेवक जयवंतराव पाटील, जयंत पाटील- काका यांच्यासह आजी- माजी नगरसेवक, पालिकेचे अधिकारी, कर्मचारी उपस्थित होते.

सक्शन कम जेटिंग मशीन (स्वच्छ भारत अभियान अंतर्गत)
कराड नगरपरिषदेला स्वच्छ भारत अभियानांतर्गत अंदाजे 1 कोटी रुपये किंमतीची अत्याधुनिक सक्शन कम जेटिंग मशीन प्राप्त झाली आहे. या वाहनाची एकूण क्षमता 8 हजार लिटर असून त्यामध्ये 4 हजार लिटर सक्शन व 4 हजार लिटर जेटिंग क्षमता आहे. ही मशीन गटारे, भूमिगत गटार (Sewer Line), मॅनहोल तसेच सांडपाणी वाहिन्यांमधील गाळ, कचरा व अडथळे यांत्रिक पद्धतीने प्रभावीरीत्या दूर करण्यासाठी अत्यंत उपयुक्त आहे. या आधुनिक यंत्रणेमुळे शहरातील स्वच्छता व्यवस्था अधिक गतिमान, सुरक्षित आणि कार्यक्षम होणार असून, नागरिकांना अधिक चांगल्या स्वच्छता सुविधा उपलब्ध होतील.

Force Gurkha 4×4 Mini Fire Tender (नगर प्रशासन संचालनालय – DMA मार्फत)
कराड नगरपरिषदेच्या अग्निशमन विभागास महाराष्ट्र शासनाच्या नगर प्रशासन संचालनालय (DMA) मार्फत अंदाजे 98 लाख रुपये किंमतीचे Force Gurkha 4×4 Mini Fire Tender उपलब्ध झाले आहे. हे अत्याधुनिक वाहन शहरातील अरुंद रस्ते, ग्रामीण भाग, औद्योगिक क्षेत्र तसेच आपत्कालीन अग्निशमन व बचाव कार्यासाठी अत्यंत उपयुक्त ठरणार आहे. या वाहनामध्ये 300 लिटर पाणी साठवण क्षमता, 30 लिटर फोम क्षमता, अत्याधुनिक Rescue Tools तसेच First Aid Box उपलब्ध असून, आग विझविण्याबरोबरच बचाव कार्य अधिक जलद आणि प्रभावीपणे पार पाडणे शक्य होणार आहे. यामुळे कराड नगरपरिषदेच्या अग्निशमन विभागाची आपत्कालीन प्रतिसाद क्षमता लक्षणीयरीत्या वाढणार आहे.