खूनाचा बदला : कराड तालुक्यातील 1983 खून प्रकरणातील संशयित 36 वर्षांनी पोलिसांच्या ताब्यात
कराड | पाल (ता. कराड) येथे 36 वर्षापूर्वी खून करून फरार असलेल्या एका संशयितास पोलिसांनी पकडले. खूनाचा बदला घेण्यासाठी 1983 साली एकाचा कोयता, कुऱ्हाडीने खून करण्याता आला होता. लाला सिद्ध्राम तेली असे संशयित आरोपीचे नाव असून, अतिरिक्त पोलिस अधीक्षक बापू बांगर यांना खबऱ्यामार्फत मिळालेल्या माहितीच्या आधारे त्यास पकडण्यात आले. या प्रकरणात संपत सिद्ध्राम तेली, महादेव सिद्ध्राम तेली, दत्तू अण्णा तेली, लाला सिद्ध्राम तेली (सर्व रा. मनव, ता. कराड) अशी खूनातील संशयितांची नावे आहेत.
पोलिसांनी दिलेल्या माहितीनुसार, भीमराव सिद्धाम तेली (रा. मनव, ता. कराड) याचा त्याच गावातील बाळू सरगर, दत्तू यलमारे वगैरे लोकांनी 1983 मध्ये खून केलेला होता. त्याचा बदला म्हणून लाला सिद्ध्राम तेली, संपत सिद्ध्राम तेली, महादेव सिद्ध्राम तेली व दत्तू अण्णा तेली यांनी दत्तू ज्ञानू यलमारे (रा. पाल, ता. कराड) याचा निर्घृण खून केला होता. त्याबाबत उंब्रज पोलिस ठाण्यात गुन्हा दाखल होता. गुन्ह्यातील संशयित लाला सिद्ध्राम तेली हा गुन्हा घडल्यापासून 36 वर्ष फरार होता. कराड शहरात गणेशोत्सव बंदोबस्तकरिता हजर असताना अतिरिक्त पोलिस अधीक्षक बापू बांगर यांना खबऱ्यामार्फत लाला सिद्धाम तेली हा त्याचे राहते घरी आलेला आहे, अशी माहिती मिळाली. त्यानंतर बापू बांगर यांनी पोलिस उपनिरीक्षक विश्वास कडव यांचे पथकास त्याचा शोध घेऊन खात्री ताब्यात घेऊन संबंधित पोलिस ठाणेस हजर करण्याबाबत सूचना दिल्या. त्याप्रमाणे पथकाने मनव येथे जाऊन सापळा लावून संशयितास त्याचे राहते घरातून मध्यरात्रीचे सुमारास शिताफीने पकडून पुढील कार्यवाहीसाठी उंब्रज पोलिस ठाणे येथे हजर केले.
कारवाईमध्ये पोलिस अधीक्षक समीर शेख, अतिरिक्त पोलिस अधीक्षक बापू बांगर यांच्या मार्गदर्शनाखाली वाचक पोलिस उपनिरीक्षक विश्वास कडव, सहायक पोलिस उपनिरीक्षक नितीन शेळके, मकरंद कवडे, राकेश देवकर, गणेश जाधव, चालक पोलिस नाईक उदय यादव आशिष पाटील यांनी सहभाग घेतला.
