डंपर- दुचाकी अपघात : आळंदी- पंढरपूर पालखी मार्गावर दोन मित्र ठार
फलटण | आळंदी- पंढरपूर राष्ट्रीय पालखी महामार्गावर तांबमळा (फरांदवाडी, ता. फलटण) गावच्या हद्दीत टिप्परने दुचाकीला समोरून जोरदार धडक दिली. यात दुचाकीवरील दोन मित्र ठार झाले. अमिर ताजुद्दीन शेख (वय- 32 रा. शुक्रवार पेठ, फलटण) व गणेश सुनील लोंढे (वय- 35 रा. मंगळवार पेठ, फलटण) अशी त्यांची नावे आहेत.
याबाबत फलटण शहर पोलिसांनी दिलेली माहिती अशी, अमिर शेख व गणेश लोंढे हे मंगळवारी मध्यरात्री सव्वाबारा वाजण्याच्या सुमारास दुचाकीवरून (एमएच- 11 सीपी- 4778) फलटणकडे येत होते. दुचाकी तांबमाळ (फरांदवाडी) येथे आली असता भरधाव लोणंदकडे निघालेल्या दहाचाकी डंपरने (एमएच- 09 एफएल- 6088) समोरून जोरदार धडक दिली. यात दुचाकीवरील अमिर शेख व गणेश लोंढे या मित्रांचा मृत्यू झाला. याप्रकरणी टिप्पर चालक अमित साह ललनसाह (मूळ रा. ग्रामपोस्ट, बिहार, सध्या रा. धुळदेव, ता. फलटण) याच्यावर शहर पोलिस ठाण्यात गुन्हा दाखल झाला आहे.
याबाबतची फिर्याद जमशेद दादामिया पठाण (वय- 47, रा. शुक्रवार पेठ, फलटण) यांनी दिली असून पुढील तपास पोलिस उपनिरीक्षक सूरज शिंदे करीत आहेत. दरम्यान, अमिर शेख हे बिर्याणी हाऊस चालवीत होते तर गणेश लोंढे याचा चायनिजचा गाडा होता. या दोघा मित्रांच्या अकाली जाण्याने हळहळ व्यक्त होत होती.
