सातारा जिल्हा बॅंकेचे राजकारण पेटले : सोसायटी ठरावावरून कोयता, खुरपे, काठीने मारामारी

सोसायटी ठरावास विरोध करत असल्याच्या कारणावरून एकास मारहाण
कराड ः- सोसायटीचा ठराव घेण्यास विरोध करत असल्याच्या कारणावरून चिडून जाऊन आठजणांनी काठीने व लाथाबुक्क्यांनी मारहाण करून गंभीर जखमी केल्याची घटना गुरूवारी सकाळी घडली होती. याबाबतची फिर्याद सर्जेराव शामराव माने रा. मालखेड, ता. कराड यांनी ग्रामीण पोलिसात दिली असून याप्रकरणी आठजणांवर गुन्हा नोंद करण्यात आला आहे. याप्रकरणात कराड तालुका पोलिसात परस्परविरोधी फिर्यादी दाखल झाल्या आहेत.दत्तात्रय तुकाराम माने, अशोक विठोबा माने, शुभम अशोक माने, रणजित आनंदा माने, सत्यजित अशोक माने, मदन दिनकर माने, विश्वजीत दत्तात्रय माने, धनाजी आनंदा माने सर्वजण रा. मालखेड, ता. कराड अशी गुन्हा नोंद झालेल्यांची नावे आहेत.

याबाबत पोलिसांनी दिलेली माहिती अशी, मालखेड सोसायटीमध्ये ठराव घेण्यासाठी गुरूवारी सकाळी मिटींग होती. त्यावेळी आरडाओरडा झाल्याचा आवाज ऐकल्यानंतर फिर्यादी सर्जेराव माने सोसायटीकडे गेले असता तेथे वरील आठजणांनी फिर्यादीचा भाऊ बाजीराव माने यास हौशिराव दादू लोकरे यांचे नावाचा ठराव घेण्यास तू विरोध का करतो असे म्हणून शिवीगाळ, दमदाटी करत लाथाबुक्क्यांनी मारहाण करत होते. त्यावेळी बाजीराव माने यास वाचविण्याकरीता गेलो असता सत्यजित माने याने हातातील काठीने फिर्यादीच्या डोक्यात मारली. त्याचवेळी मदन माने याने त्याच्या हातातील खुरप्याने हातावर मारून जखमी केले. याबाबत सर्जेराव माने यांनी कराड तालुका पोलिसात फिर्याद दिली असून याप्रकरणी आठजणांवर गुन्हा नोंद करण्यात आला आहे. अधिक तपास सहाय्यक पोलीस उपनिरीक्षक अभय तावरे करीत आहेत.

मालखेड येथे सोसायटी ठरावावरून चेअरमनला मारहाण
कराड ः- जिल्हा बँक निवडणूक ठरावावरून मालखेड (ता. कराड) येथे सदस्यांमध्ये जोरदार राडा झाला. एका सोसायटी सदस्यासह त्याच्या भावाने आपल्या नावाचा ठराव करावा या कारणासाठी चेअरमन यांना मारहाण केली. यावेळी भांडणे सोडविण्याचा प्रयत्न केल्याचा राग मनात धरून अन्य एका सोसायटी सदस्यावर कोयत्याने वार करण्यात आला आहे. या खळबळजनक घटनेनंतर तालुका पोलीस ठाण्यात सशस्त्र हल्ला करणाऱ्या सोसायटी सदस्यासह त्याच्या भावाविरोधात गुन्हा दाखल करण्यात आला आहे. बाजीराव शामराव माने आणि सर्जेराव शामराव माने अशी दोघा संशयितांची नावे आहेत. अशोक विठोबा माने (वय 58) असे जखमी सोसायटी सदस्याचे नाव आहे. त्यांनीच याप्रकरणी फिर्याद दाखल केली आहे.

गुरूवारी सकाळी 10.30 वाजता मालखेड सोसायटीमध्ये सातारा जिल्हा बँक निवडणुकीत मतदानाचा हक्क देण्यासाठी एका सदस्याची निवड करण्यासाठी बैठकीचे आयोजन करण्यात आले होते. या बैठकीत सोसायटी सदस्य बाजीराव माने यांनी आपल्या नावाचा ठराव करावा यासाठी आग्रह धरला होता. इतर सदस्यांनी त्याच्या नावास विरोध करत हौसेराव लोकरे यांच्या नावाला पसंती दिली. या कारणावरून बाजीराव माने यांनी वाद घालण्यास सुरूवात केली. बाजीराम माने आरडाओरडा करत असल्याने सोसायटी बाहेर थांबलेला त्याचा भाऊ सर्जेराव माने सोसायटीमध्ये आला आणि त्याने चेअरमन दत्तात्रय माने यांना पकडले आणि त्यांना मारहाण केली. त्यावेळी अशोक माने यांच्यासह इतर सदस्यांनी मध्यस्थी करत भांडणे मिटविण्याचा प्रयत्न केला.

भांडणे मिटल्यानंतर सर्वजण सोसायटीबाहेरील रस्त्यावर चर्चा करत असताना सर्जेराव व बाजीराव माने हे दोघे भाऊ त्या ठिकाणी आले. सर्जेराव याने त्याच्या हातातील कोयत्याने अशोक माने यांच्यावर वार केला. हा वार अशोक माने यांच्या डाव्या हातावर बसला आणि त्यात ते जखमी झाले. यावेळी दोघा संशयित भावांनी रणजित आनंदराव माने यांनाही मारहाण केली. या मारहाणीत रणजित माने हे जबर जखमी झाले असून दोघे संशयित कोयता टाकून पळून गेल्याचे फिर्यादीत म्हटले आहे. रणजित माने यांच्या खांद्याला दुखापत झाली असून त्यांच्यावर खाजगी रूग्णालयात उपचार सुरू आहेत. अधिक तपास पोलीस करीत आहेत.