उदयनराजेंना खासदारकीचे तिकिट मिळणार का? नंदीबैल काय म्हणतोय..
सातारा प्रतिनिधी | वैभव बोडके
सध्या लोकसभा निवडणुकीची धामधूम सुरू झाली असून नेते अन् त्यांचे कार्यकर्ते भन्नाट आयडिया वापरताना पहायला मिळतात. परंतु, आपल्या नेत्याला तिकिट मिळावं, यासाठी आता चक्क नंदी बैलाकडेचं विचारणा करण्यात आली आहे. साताऱ्यातील छत्रपती उदयनराजे भोसले यांच्या कार्यकर्त्यांनी भाजपाचे लोकसभेचे तिकिट महाराजांना मिळणार का असा सवाल केला आहे. त्यावर नंदीबैलाने उत्तर दिलं आहे. सध्या नंदीबैलाचा हा व्हिडिअो सोशल मिडियावर चांगलाच व्हायरल होत आहे.
उदयनराजे यांना लोकसभेचे तिकिट मिळण्यासाठी भाजप पक्षातूनच अडचणी होत असल्याने कार्यकर्ते आक्रमक झाले असून काल ग्रामविकास मंत्री गिरीश महाजन यांनी उदयनराजे यांची साताऱ्यातील जलमंदिर पॅलेस येथे भेट घेतली. या भेटीनंतर उदयनराजेंचा उपयोग मतदान आणि प्रचारासाठी कसा करायचा, यांची रणनिती भाजप आखत असल्याचे गिरीश महाजन यांनी म्हटले आहे. बोलता… बोलता तिकिट नाकारण्याचा प्रश्न नसल्याचे सांगत तिकिट फिक्स असल्याचे सांगितले असले तरी सातारकरांना अजूनही खात्री नाही.
गिरीश महाजन यांच्या आश्वासनानंतरही छ. उदयनराजे यांना तिकिट मिळणार की नाही यांची विचारणा थेट नंदीबैलाकडे केली असून त्यांचा व्हिडीअो आता सोशल मिडियावर चांगलाच व्हायरल होवू लागला आहे. आता नंदी बैलाने उदयनराजेंना तिकिट मिळणार असल्याचे सांगितले असले तरी भाजप तिकिट देणार की छत्रपती उदयनराजे वेगळा निर्णय घेणार हे पहावे लागेल. साताऱ्यातील महायुती आणि महाविकास आघाडीचा तिकिट वाटपाचा घोळ मिटला नाही. तसेच महायुतीतून छ. उदयनराजे यांना तिकिट अद्याप जाहीर न झाल्याने त्याचे समर्थक आक्रमक झाले आहेत. आमच्या सातारच्या राजेंना तिकिट मिळेल का असे कार्यकर्त्यांनी विचारताच, नंदीबैल हो म्हणाला.
