मलकापूरात दोन गटात मारामारी : 20 जणांवर गुन्हा तर 8 जण जखमी
कराड | रस्त्याचा वाद तसेच पुर्वी झालेल्या भांडणाच्या कारणावरुन दोन कुटूंबात जोरदार धुमश्चक्री उडाली. यावेळी तलवार, लाकडी दांडक्यासह लाथाबुक्क्याने एकमेकांना मारहाण करण्यात आली. तसेच दगडफेक करुन वाहनांचेही नुकसान करण्यात आले. मलकापूर येथील विश्रामनगरमध्ये ही घटना घडली. दरम्यान, याबाबत कराड शहर पोलीस ठाण्यात परस्परविरोधी फिर्यादी दाखल झाल्या आहेत. या फिर्यादीवरुन दोन्ही गटातील सुमारे वीस जणांवर गुन्हा दाखल करण्यात आला आहे. तर आठजण जखमी झाले आहेत.
रुपेश प्रफुल्ल काळसेकर यांनी दिलेल्या फिर्यादीवरुन सचिन माळवदे, सोहम सचिन माळवदे, सौरभ सचिन माळवदे आणि सारिका सचिन माळवदे यांच्यावर गुन्हा दाखल करण्यात आला आहे. घराजवळील रिकाम्या जागेत असलेल्या रस्त्याच्या कारणावरून आरोपींनी तलवार हल्ला केला. तसेच लाकडी दांडक्याने मारहाण केली. या मारहाणीत रुपेश काळसेकर, त्यांची आई पुष्पा तसेच शेजारी युवराज पाटील व मिथिलेश महिंदकर जखमी झाले. मिथिलेश महिंदकर यांना तलवार लागली असल्याचे फिर्यादीत म्हटले आहे.
याउलट सचिन सुरेश माळवदे यांनी फिर्याद दिली आहे. या फिर्यादीवरुन रुपेश काळसेकर, पप्पू काळसेकर, योगेश काळसेकर, युवराज पाटील, सुरज यमगर यांच्यासह पंधराजणांवर गुन्हा दाखल करण्यात आला आहे. पूर्वी झालेल्या भांडणाच्या रागातून आरोपींनी वाहनांवर तसेच घरावर दगडफेक करीत मारहाण केल्याचे सचिन माळवदे यांच्या फिर्यादीत म्हटले आहे. आरोपींनी केलेल्या मारहाणीत सचिन माळवदे, त्यांची मुले सौरभ, सोहम आणि पत्नी सरिता हे जखमी झाले आहेत. हवालदार विजय मुळे तपास करीत आहेत.
