अल्पवयीन मुलीवर अत्याचार प्रकरणी मलकापूर मधील एकाला सक्तमुजरी

कराड | अल्पवयीन मुलीवर अत्याचार केल्याप्रकरणी एकाला सक्तमजुरीची शिक्षा सुनावण्यात आली. येथील अतिरीक्त जिल्हा व सत्र न्या. के. एस. होरे यांनी ही शिक्षा ठोठावली. संतोष शिवाजी बागल (वय- 26, रा. मलकापूर, ता. कराड) असे शिक्षा सुनावलेल्या आरोपीचे नाव आहे.

सरकार पक्षाकडून देण्यात आलेल्या माहितीनुसार, मलकापूर येथील संतोष बागल याचा विवाह झाला असतानाही त्याने अल्पवयीन मुलीला लग्नाचे अमिष दाखवून पळवून नेले होते. त्यानंतर त्याने शिर्डी व शनी शिंगणापूर येथील लॉजवर नेवून तीच्यावर अत्याचार केला. तसेच हा प्रकार कोणाला सांगितल्यास भावाला ठार मारेन आणि बहिणीचे अपहरण करेन, अशी धमकी त्याने मुलीला दिली होती. याबाबत पिडीत मुलीने दिलेल्या फिर्यादीवरुन कराड तालुका पोलीस ठाण्यात संतोष बागल याच्यावर गुन्हा नोंदविण्यात आला होता.

तत्कालिन पोलीस निरीक्षक अशोक क्षिरसागर व उपनिरीक्षक अशोक भापकर यांनी या गुन्ह्याचा तपास करुन आरोपीविरुद्ध न्यायालयात दोषारोपपत्र सादर केले. खटल्यात सरकार पक्षाच्यावतीने अ‍ॅड. राजेंद्र शहा यांनी काम पाहिले. सरकार पक्षाचा युक्तिवाद तसेच सादर करण्यात आलेले पुरावे ग्राह्य धरुन न्यायालयाने आरोपी संतोष बागल याला दहा वर्ष सक्तमजुरी व 25 हजार रुपये दंड तसेच दंड न भरल्यास आणि तीन महिने सक्तमजुरी अशी शिक्षा सुनावली. दरम्यान, दंडाच्या रक्कमेतून पिडीत मुलीला 25 हजार रुपये नुकसान भरपाई म्हणून देण्याचा आदेशही न्यायालयाने केला आहे. सरकार पक्षाला अ‍ॅड. ऐश्वर्या यादव, अ‍ॅड. कोमल लाड यांनी सहकार्य केले.