कास पर्यटकांचे खास : हंगाम बहरल्याने तब्बल 50 हजारांहून अधिक भेटीचा अंदाज, ट्रॅफिक जाम
सातारा प्रतिनिधी | वैभव बोडके
सातारचे नंदनवन म्हणून ओळख असलेले कास पुष्प पठार गेल्या काही दिवसांपासून फुलांनी भरले असून आता ही फुले पाहण्यासाठी पर्यटकांनी गर्दी करण्यास सुरुवात केली आहे. कालपासूनच सलग सुरू झालेल्या सुट्ट्यांमुळे राज्यासह देशातील अनेक पर्यटकांनी कास पुष्प पठाराला भेटी देऊन कासवर आलेली दुर्मिळ फुले पाहण्यासाठी येत आहे. आज दिवसभरात ऑनलाइनच्या माध्यमातून तब्बल 7 हजाराहून अधिक पर्यटकांनी कास पुष्प पठाराला भेटी देण्यासाठी ऑनलाइन नोंद केलेल्या देखील कास समितीच्या वतीने सांगण्यात आले आहे. आज कासला पर्यटकांनी मोठी पसंती दिल्याने वाहनांच्या लांबच लांब रांगा लागलेल्या पहायला मिळत आहेत.
सलग सुरू असलेल्या सुट्ट्यांमुळे पार्टकणी कास पुष्प पठाराला भेटी देण्यासाठी प्राधान्य दिल्याने या सलग सुट्ट्यांमध्ये तब्बल 40 ते 50 हजार पर्यटक कास पठारावरील दुर्मिळ फुले पाहण्यासाठी येतील, असा अंदाज कास पुष्प पठार विकास समितीला आहे. कास पठारवर येणाऱ्या पर्यटकांना पार्किंग पासून कास पठारावर आणण्यासाठी खाजगी बसची सुविधा करण्यात आली आहे. इतर वेळेला दोन बसेसच्या माध्यमातून पर्यटकांना कास पठारावर आणले जाते. मात्र, आलेल्या सलग सुट्ट्यांसाठी कास समितीने तब्बल 10 बसेस उपलब्ध केले असून त्याच्या माध्यमातून पर्यटकांना कास पुष्प पठारावर फुले पाहण्यासाठी आणले जात आहे. पर्यटकांची वाढत चाललेली गर्दी पाहता कास समितीने देखील उपाययोजना म्हणून ही पावले उचलायला सुरुवात केली आहे.
कास पुष्प पठारावर अतिदुर्मिळ असलेली सर्वच फुलांचे गालीचे पाहायला मिळत असून पठारावर असलेले वातावरण देखील पर्यटकांचा आनंद द्विगुणित करत आहेत. यंदाच्या वर्षी कास पुष्प पठारावर टोपली कारवीची सात वर्षांनी फुलणारी फुले देखील मोठ्या संख्येने फुलल्याने त्याचा देखील पर्यटकांना आनंद लुटता येत आहे. तर कासवर असलेले लोखंडी कुंपण काढल्यामुळेच यंदा कास पुष्प पठार मोठ्या प्रमाणात भरले असल्याचे देखील कास पुष्प पठार समितीच्या वतीने सांगण्यात आले. राज्यासह संपूर्ण देशातून पर्यटक कासपुष्प पठारला भेटी देत असून त्यांनीदेखील कास पुष्प पठारावरील निसर्ग पाहून आपल्या आनंदी भावना पर्यटक व्यक्त करत आहेत.
