महामार्गावर मध्यरात्री दरोडा : 17 किलो चांदी, 11 तोळे सोने स्प्रे मारून लुटले
सातारा | बोरगाव पोलिस ठाणे हद्दीत कुरिअरच्या गाडीतून सोने व चांदीच्या विटा लुटण्याची थरारक घटना शनिवारी मध्यरात्री घडली. काशीळ (ता. सातारा) गावच्या हद्दीत महामार्गावर कुरिअरच्या गाडीला इनोव्हा गाडी आडवी मारून 9 संशयितांनी दोघांच्या तोंडावर स्प्रे मारून दागिन्यांचे पार्सल लंपास केले. दरम्यान, या थरारक घटनेनंतर अवघ्या काही तासांत पसार झालेल्या चोरट्यांच्या टोळीला यवत पोलिस व पुणे ग्रामीण स्थानिक गुन्हे अन्वेषण विभागाने जेरबंद केले. टोळीतील चौघांकडून 17 किलो चांदी, 11 तोळे सोने आणि कार जप्त करण्यात आली. त्यांचे दोन साथीदार पसार होण्यात यशस्वी झाले. पुणे- सोलापूर महामार्गावरील कासुर्डी टोल नाका येथे रविवारी पहाटे 6 वाजण्याच्या सुमारास ही कारवाई करण्यात आली.
याबाबत कुरिअरचे पार्सल नेणाऱ्या बोलेरो चालक संतकुमारसिंग उरणसिंग परमार (सध्या रा. शिवाजी चौक कोल्हापूर) यांनी बोरगाव पोलिस ठाण्यात फिर्याद दिली. संतकुमारसिंग हे साईनाथ एक्सप्रेस कुरिअरसाठी मुंबई शाखेत काम करतात. मात्र, कोल्हापूर शाखेचा कर्मचारी आजारी असल्याने गेल्या पाच दिवसांपासून ते बोलेरो (क्र एम. एच. 43 बी. पी. 8427) या गाडीवर सोन्या-चांदीचे दागिन्यांच्या कुरिअरचे बॉक्स पोहचवण्याचे काम करत आहेत. शनिवारी रात्री 10 वाजता कोल्हापूर येथील दागिन्यांच्या कुरिअरचे पार्सल घेऊन ते पुण्याच्या दिशेने जात होते. यावेळी त्यांच्यासोबत गोलू दिनेश परमार (रा. बसेरी, राजस्थान) हे होते. संतकुमारसिंग यांची बोलेरो काशीळ येथे आली असता पाठीमागून आलेल्या इनोव्हा कारने त्यांना थांबवण्याचा प्रयत्न केला. मात्र, संतकुमारसिंग हे न थांबल्याने इनोव्हा चालकाने गाडी आडवी मारली. यावेळी इनोव्हातील चार संशयितांनी संतकुमारसिंग व गोलू यांच्या चेहऱ्यावर स्प्रे मारून ते बोलेरो गाडी ताब्यात घेत सातारच्या दिशेने निघून गेले. याचदरम्यान पाठीमागून दोन दुचाकीवरून आलेल्या संशयितांनी काही काळ दोघांनाही पकडून ठेवले. यानंतर दोघांना ढकलून त्यांनीही पोबारा केला. घटनेनंतर संतकुमार सिंग यांनी स्थानिकाच्या मोबाईलवरून ही माहिती कंपनीचे मॅनेजर राजकिशोर परमार यांना दिली. यानंतर परमार व हुपरी शाखेचे मॅनेजर तुषार नाईक हे काशीळ येथे आले. त्यांनी याची माहिती पोलिसांना दिली.
या घटनेत चोरट्यांनी 10 लाख 50 हजार रूपयांची 17 किलो चांदी व 7 लाख 12 हजार रूपयांचे 11 तोळे सोने असा 17 लाख 62 हजार रूपयांचा मुद्देमाल लंपास केला. या घटनेचा तपास सपोनि रवींद्र तेलतुंबडे व पोलिस उपनिरीक्षक वर्षा डाळींबकर करत पथकाने ही कामगिरी केली. यवत पोलिसांनी संशयितांना रविवारी पहाटे जेरबंद या टोळीला कासुर्डी टोल नाक्यावर पकडले. त्यांच्याकडून 17 किलो चांदी आणि 11 तोळे सोने जप्त केले. चोरट्यांनी गुन्ह्यात वापरलेली इनोव्हा कार पोलिसांनी ताब्यात घेतली आहे.
