आगाशिवनगर परिसरात पोलिसांचे कोम्बिंग ऑपरेशन : चार दुचाकी घेतल्या ताब्यात
कराड | आगाशिवनगर परिसरासह झोपडपट्टीत रात्री पोलीस उपअधिक्षकांच्या पथकाने कोम्बिंग ऑपरेशन राबवले. या कारवाईने रेकॉर्डवरील गुन्हेगारांचे धाबे दणाणले असून अनेक संशयितांकडे कसून चौकशी केली. या कारवाईत पोलिसांनी चार दुचाकी हस्तगत केल्या आहेत. या दुचाकी नेमक्या कोणाच्या आहेत याचा तपास सुरू असल्याचे पोलीस उपअधिक्षक अमोल ठाकूर यांनी सांगितले. दरम्यान आगाशिवनगर भागात जर कोणी सामान्य लोकांना त्रास देण्याचा प्रयत्न करत असेल तर त्यांनी पोलिसांशी संपर्क साधावे असे आवाहन उपअधिक्षक ठाकूर यांनी केले.
उपअधिक्षक अमोल ठाकूर यांनी कराडचा कार्यभार घेतल्यानंतर रेकॉर्डवरील गुन्हेगारांच्या मुसक्या आवळण्यास सुरूवात केली आहे. गत पंधरा दिवसांपुर्वी त्यांनी बुधवारपेठेत अचानक कोम्बिंग ऑपरेशन राबवून तडीपार असलेल्या संशयिताला ताब्यात घेतले होते. त्यानंतर मसूर भागातील युवकाकडून पिस्टल हस्तगत करत त्याला कराडात ताब्यात घेतले. शुक्रवारी ठाकूर यांच्या पथकाने आगाशिवनगर भागात अचानक कोम्बिंग ऑपरेशन राबवले.
रेकॉर्डवरील गुन्हेगारांची तपासणी करत त्यांचे सध्याच्या हालचाली काय आहेत याची माहिती घेतली. विशेषतः झोपडपट्टीत तपासणी करत अवैध व्यावसायिकांवर कारवाईचा बडगा उगारला. या भागात चार संशयित दुचाकीही पोलिसांना मिळून आल्या. या दुचाकी पोलीस ठाण्यात आणल्या असून त्या कोणाच्या आहेत? कशासाठी वापरल्या गेल्या आहेत? याचा तपास सुरू आहे.
