आ. शिवेंद्रराजेंच्या बालेकिल्यात आ. शशिकांत शिंदेंची जोरदार एंन्ट्री : JCBतून पुष्पवृष्टी

सातारा | जावळी तालुक्यातील केळघर येथे राष्ट्रवादी युवक आघाडीची स्वाभिमान सभा आयोजित करण्यात आली होती. यावेळी आमदार शशिकांत शिंदे यांची ढोल- ताशा आणि हलगीच्या गजरात भव्य मिरवणूक काढली. दरम्यान, शशिकांत शिंदे यांच्यावर जेसीबी मधून पुष्पवृष्टी करत शेकडो कार्यकर्त्यांच्या उपस्थितीत मोठ्या जल्लोषात त्यांच स्वागत करण्यात आलं. आ. शिवेंद्रराजेंच्या सातारा- जावळी विधानसभा मतदार संघात आ. शशिकांत शिंदे यांची जोरदार एंन्ट्री झाल्याने राजकीय चर्चांना उधाण आले आहे.

ज्या ठिकाणी राष्ट्रवादीतील कार्यकर्ते अजित पवार गटासोबत गेले आहेत. त्याठिकाणी आमदार श्री. शिंदे हे स्वाभिमान सभा घेताना पाहायला मिळत आहेत. या सभेला‌ राष्ट्रवादी आयटी सेलचे अध्यक्ष सारंग पाटील तसंच जिल्हा युवकचे जिल्हाध्यक्ष आतिष कदम आणि कार्यकर्ते उपस्थित होते. मात्र, हा मतदारसंघ भाजपाचे आमदार शिवेंद्रराजे भोसले यांचा म्हणुन ओळखला जातो. यामुळं या ठिकाणी शशिकांत शिंदे यांच्या झालेल्या स्वागताची चर्चा सध्या जिल्ह्यात जोरदार सुरु झाली आहे.

आ. शशिकांत शिंदे हे शरद पवार यांच्यासोबत आहेत. आ. शिवेंद्रसिंहराजे भोसले हे भाजपात असून ते अजित पवार यांच्या जवळचे आहेत. अशावेळी राष्ट्रवादीच्या शरद पवार यांच्या गटाची ताकद वाढविण्यासाठी सातारा- जावळी मतदार संघात आ. शशिकांत शिंदे यांनी जोरदार तयारी केल्याचे पहायला मिळत आहे. आज केळघर येथे झालेलं जोरदार स्वागत यामुळे राष्ट्रवादीच्या कार्यकर्त्यांच्यात चैतन्य निर्माण झाल्याचे दिसत आहे.