कराड पोलिस ठाण्यात आरोपीचा डोके आपटून आत्महत्येचा प्रयत्न

कराड | गुन्ह्यात अटक केलेल्या आरोपीने पोलीस कोठडीत स्वत:वर टोकदार शस्त्राने वार करून घेऊन तसेच भिंतीवर डोके आपटून घेवून आत्महत्येचा प्रयत्न केला. कराड शहर पोलीस ठाण्यात रात्री आठ वाजण्याच्या सुमारास ही घटना घडली. सोनू उर्फ संजीव कपूरसिंग टाक (वय- 28, रा. हडपसर, गाडीतळ, तुळजाभवानी वसाहत, ससाणेनगर, पुणे) असे आत्महत्येचा प्रयत्न केलेल्या आरोपीचे नाव आहे.

पोलिसांनी दिलेल्या माहितीनुसार, कराड शहर पोलीस ठाण्यात दाखल असलेल्या गुन्ह्यामध्ये आरोपी सोनू उर्फ संजीव टाक याला न्यायालयाच्या आदेशानुसार वर्ग करण्यात आले होते. आरोपी येरवडा कारागृहात होता. न्यायालयाकडील ट्रान्सफर वॉरंटवरून पोलिसांनी त्याला ताब्यात घेऊन गुरूवारी दि. 4 रोजी सायंकाळी कराड शहर पोलीस ठाण्यात आणले. त्याठिकाणी त्याला अटक करण्यात आले. तसेच लॉकअप मध्ये जमा करण्यात आले. लॉकअपमध्ये जमा करताना तेथील पोलीस कर्मचाऱ्यांनी आरोपी टाक याची अंगझडती घेतली.

मात्र, त्याच्याकडे काहीही आढळून आले नाही. त्यानंतर त्याला लॉकअपमध्ये ठेवण्यात आले. त्यानंतर रात्री साडेआठ वाजण्याच्या सुमारास लॉकअपमध्ये आरोपी सोनू उर्फ संजीव टाक याने बाथरूममध्ये डोके आपटण्यास सुरुवात केली. हा प्रकार निदर्शनास येताच पोलिसांनी त्याठिकाणी धाव घेऊन त्याला ताब्यात घेतले. त्यावेळी त्याच्या पोटावर टोकदार वस्तूने जखमा करून घेतल्याचे आढळून आले. तसेच भिंतीवर डोके आपटल्याने डोक्यालाही जृखम झाली होती. त्यामुळे पोलिसांनी उपचारार्थ त्याला तातडीने वेणूताई चव्हाण उपजिल्हा रुग्णालयात दाखल केले. त्याच्यावर उपचार सुरू आहेत. पोलीस उपनिरीक्षक मारुती चव्हाण तपास करीत आहेत.