सह्याद्री कारखाना महिन्याला 7 किलो साखर 10 रुपये दराने देणार : आ. बाळासाहेब पाटील यांची घोषणा

मसूर प्रतिनिधी| गजानन गिरी
सभासदांनी पाच- सहा वर्षापासून वाढीव साखरेची मागणी केली होती. सभासदांच्या मागणीचा विचार करत सह्याद्री सहकारी साखर कारखाना महिन्याला सात किलो साखर दहा रुपये दराने देणार असल्याची घोषणा कारखान्याच्या वार्षिक सर्वसाधारण सभेत माजी सहकार व पणनमंत्री कारखान्याचे चेअरमन आमदार बाळासाहेब पाटील यांनी केली. यशवंतनगर (ता. कराड) येथे सह्याद्री सहकारी साखर कारखान्याच्या 53 व्या वार्षिक सर्वसाधारण सभेत ते बोलत होते.

यावेळी राष्ट्रवादीचे जिल्हाध्यक्ष सुनील माने, तालुकाध्यक्ष देवराज पाटील, शहाजीराव क्षिरसागर, रहिमतपूरचे नगराध्यक्ष आनंदा कोरे, जिल्हा बँकेचे संचालक लहूराज जाधव, राष्ट्रवादीचे सरचिटणीस संभाजीराव गायकवाड, कारखान्याच्या उपाध्यक्ष लक्ष्मीताई गायकवाड, संचालक माणिकराव पाटील, लालासाहेब पाटील, संजय थोरात, पांडुरंग चव्हाण, कांतीलाल पाटील, अविनाश माने आजी माजी जिल्हा परिषद, पंचायत समिती सदस्य व माजी संचालक उपस्थित होते.

आमदार पाटील म्हणाले, सहकारी साखर कारखान्यांनी रस्ते करायचे अन् ऊस मात्र खाजगीकडे घालायचा ही गंभीर बाब आहे. सहकारी कारखान्याकडे ऊस येण्याची काळजी सर्वांनी घ्यावी. सर्व सभासद ऊस उत्पादकांचा सर्व ऊस नेण्याची जबाबदारी सहकारी साखर कारखाना पार पाडत असतो.दरम्यान या सरकारने सप्टेबर संपत आला तरी मंत्री समितीची बैठक घेतलेली नाही. त्यामुळे सहकारी साखर कारखानदारीचे धोरण अद्याप ठरलेले नसल्याने मोठी अडचण होणार असून काही खाजगी कारखाने मात्र सुरू झाले आहेत. पण ते कारखाने नसून खांडसरी आहे. त्यांना एफआरपी अॅक्ट लागू होत नाही.धनगरवाडी हणबरवाडी योजनेसाठी सातत्याने पाठपुरावा केल्याने हणबरवाडी शहापूर योजना सुरू झाली आहे. सभेचे नोटीस वाचन कार्यकारी संचालक आबासाहेब पाटील यांनी केले. अहवाल वाचन चिफ अकाउंटंट जी. व्ही. पिसाळ यांनी केले. आभार मानसिंगराव जगदाळे यांनी मानले.

साखरेने तोंडगड करा : अजितराव पाटील- चिखलीकर
सह्याद्री कारखाना दराबाबत नेहमीच अग्रेसर राहिला आहे. कारखान्याने सभासदांसाठी हॉस्पिटल उभारावे. सभासदांना साखर वाढवून साखरेने तोंड गोड करावे. अशी मागणी अजितराव पाटील चिखलीकर यांनी केली. कारखान्याच्या ऊस तोडणी कार्यक्रम सुरळीत सुरू असून कारखान्याचे स्लिपबॉयसह शेती विभागाचे अधिकारी व संचालक मंडळाने विशेष दक्षता घेण्याची मागणी त्यांनी केली.

सह्याद्री इज द बेस्ट…..
आज सह्याद्री सहकारी साखर कारखान्याची 53 वार्षिक सर्वसाधारण सभा कारखाना कार्यस्थळावर दुपारी दोन वाजता सुरू झाली. सभेला सुरुवात होताच जोरदार पावसाने हजेरी लावली. मात्र नावाप्रमाणेच राज्यात सर्वच बाबतीत आघाडीवर असलेल्या सह्याद्री कारखान्याने सभासदांसाठी पत्र्याचा मंडप असलेली बैठक व्यवस्था केल्याने सुमारे तासभर सुरू असलेल्या पावसातही सभा निर्विघ्नपणे पार पडली. पुन्हा एकदा राज्यात आमदार बाळासाहेब पाटील यांच्या नेतृत्वाखाली सह्याद्री इज द बेस्ट अशी चर्चा सभासदांमधून ऐकावयास मिळाली.