प्रेमसंबधातून खून : पती- पत्नीसह एकाला अटक, वाई व साताऱ्यातून आरोपी ताब्यात
सातारा | पाटखळ माथा (ता. जि. सातारा) येथे तीन दिवसापूर्वी डावा कॅनॉलमध्ये एक बेवारस पुरूष जातीचे प्रेत आढळून आले होते. सदरील बेवारस मृतदेहाचा सातारा येथील सिव्हिल हाॅस्पीटलमध्ये शवविच्छेदन केले असता, घातपात असल्याचा संशय व्यक्त केला होता. संबधित प्रेत हे खेड (ता. जि. सातारा) येथील शरद पवार यांचा असून त्याचा महिलेशी असलेल्या प्रेमसंबधातून आणि उसने दिलेल्या पैशातून खून झाल्याची माहिती समोर आली आहे. सदर गुन्ह्यात विजय सुरेश भोसले (वय- 23 वर्ष, मूळ राहणार- भोसले मळा, नागठाणे, ता. जि. सातारा, सध्या रा. नेले, पोस्ट- किडगाव ता. जि. सातारा), दादा जयराम बिचुकले (वय- 43 वर्ष, रा- बावधन, ता- वाई), मनीषा दादा बिचुकले (वय- 27 वर्ष, रा- बावधन, ता. वाई) या तीन संशयितांना पोलिसांनी ताब्यात घेवुन अटक केली आहे.
याबाबतची पोलिसांनी दिलेली माहिती अशी, पाटखळ माथा (ता. जि. सातारा) येथुन जात असलेल्या कण्हेर डावा कॅनॉलमध्ये एक अनोळखी पुरूष जातीचे प्रेत मिळुन आले होते. सातारा तालुका पोलीस ठाणेस अकस्मात मयत म्हणून नोंद करण्यात आली होती. सदरील मृतदेहाचे सिव्हील हॉस्पीटल सातारा येथील फॉरेन्सीक तज्ञ डॉ. राहुल खाडे, वैद्यकीय अकारी डॉ. हिरास यांनी पोस्टमार्टन केले. सदर अनोळखी पुरूष जातीच्या प्रेताचे दोन्ही पाय बांधले असल्याने सदर प्रकार हा घातपाताचा असल्याची शंका व्यक्त करण्यात आली होती.
बेवारस मृतदेहाची ओळख पटविण्यासाठी पोलीस ठाणेकडील पथक तयार करणेत आले होते.सदरचे प्रेत हे खेड (ता.जि. सातारा) येथील शरद मधुकर पवार याचे असल्याचे तपासामध्ये निष्पन्न झाले. त्यानंतर पोलीसांनी सदर मयताचा घातपात केलेबाबत गोपनिय माहिती प्राप्त केली असता, शरद पवार याचे बावधन येथील महिलेशी प्रेमसंबंध असल्याची माहिती प्राप्त झाली. तसेच त्यावरुन मयत शरद पवार व नेले किडगांव (ता.जि. सातारा) येथील संशयिताची मागील काही दिवसापुर्वी भांडणे झाल्याची माहिती पोलीसांना मिळाली. पोलीसांनी संशयितांना ताब्यात घेऊन त्यांचेकडे सदर मयताचे अनुषंगाने चौकशी केली असता, संशयितांनी शरद मधुकर पवार (वय- 37 वर्षे, रा. खेड ता. जि. सातारा) याचा वाढे गावचे हद्दीमध्ये दिनांक- 05/08/2023 रोजी खुन करुन त्यास जवळच असले कण्हेरचे डावे कॅनॉलमध्ये टाकुन दिली असल्याचे कबुली दिली आहे. सदर गुन्ह्याचे तपासामध्ये एकुण तीन आरोपींना अटक करण्यात आली आहे.
सदरची कारवाई पोलीस अधीक्षक समीर शेख, अप्पर पोलीस अधीक्षक बापु बांगर, उपविभागीय पोलीस अधिकारी किरणकुमार सुर्यवंशी यांचे मार्गदर्शनाखाली पोलीस निरीक्षक अरुण देवकर, पोलीस निरीक्षक विश्वजीत घोडके तसेच सातारा तालुका पोलीस ठाणे कडील पोलीस उपनिरीक्षक ज्ञानेश्वर दळवी, पोलीस उपनिरीक्षक अमित पाटील, पो.हवा दादा परीहार, पोहवा संदीप आवळे, पो. हवा सचिन घोरपडे, पोना मालोजी चव्हाण, पो.ना पंकज ढाणे, पो.ना राजु शिखरे, पो. ना तुकाराम पवार, पो. ना शिंदे, पो.ना सतिश बाबर, पो.शि. गजानन फडतरे, पो.शि. शिवाजी डफळे, पो. शि. रोहीत बाबर, तसेच स्थानिक गुन्हे शाखेकडील पो. हवा शरद बेबले, पो. हवा लैलेश फडतरे, पो. ना अरुन पाटील, पो.शि राहीत निकम यांनी केलेली आहे. सदर गुन्ह्याचा तपास पोलीस निरीक्षक विश्वजीत घोडके करीत आहेत.
