कृषी कोल्हापूर ताज्या बातम्या पश्चिम महाराष्ट्र प्रशासन ब्रेकिंग राज्य सांगली सातारा हवामान

🚨सावधानतेचा इशारा🚨 : कोयनेच्या पाणी विसर्गात बदल, धरणांची पालकमंत्र्यांनी केली पाहणी

कोयना धरण 92 टीएमसी भरले

1 minute read

पाटण :- महाराष्ट्र राज्याचे पर्यटन, खनिकर्म व माजी सैनिक कल्याण मंत्री तथा सातारा जिल्ह्याचे पालकमंत्री शंभूराज देसाई यांनी कोयना परिसराच्या दौऱ्या दरम्यान कोयना धरणाची पाहणी केली. यावेळी त्यांनी कोयना धरण व्यवस्थापनाच्या अधिकाऱ्यांकडून धरणातील पाणीसाठा, धरणात होणारी पाण्याची आवक तसेच धरणातून सोडण्यात येणाऱ्या पाण्याबाबत सविस्तर माहिती घेतली.

यावेळी बोलताना पालकमंत्री शंभूराज देसाई म्हणाले की, “कोयना भागात दौरा असल्याने कोयना धरण परिसराची पाहणी केली. सध्या कोयना धरणामध्ये ९२ टीएमसी पाणीसाठा असून पुढील काही दिवसांत धरण पूर्ण क्षमतेने भरण्याची शक्यता आहे. धरण पूर्ण भरल्यानंतर आपण पाणीपूजन करत असतो.” कोयना धरण व्यवस्थापनाकडून पाणीसाठ्याचे नियोजन योग्य पद्धतीने करण्यात येत असून, आतापर्यंत धरणातील पाण्याचे नियोजन चांगल्या प्रकारे करण्यात आले आहे, असेही त्यांनी सांगितले.

तसेच कोयना नदीलगतच्या गावांमध्ये पाण्याच्या परिस्थितीवर लक्ष ठेवण्यासाठी पदाधिकारी, जिल्हा परिषद व पंचायत समिती सदस्य नागरिकांना आवश्यक ती मदत करीत आहेत. नदीकाठच्या गावांच्या सुरक्षिततेच्या दृष्टीने प्रशासन व स्थानिक पदाधिकारी सतर्क असल्याचेही त्यांनी नमूद केले. यावेळी कोयना धरण व्यवस्थापनाचे अधिकारी, पदाधिकारी तसेच संबंधित मान्यवर उपस्थित होते.

🚨सावधानतेचा इशारा🚨

कोयना धरणाची पाणी पातळी नियंत्रित करणेसाठी आज दि. ०२ ऑगस्ट २०२६ रोजी सायंकाळी ०६:०० वा. कोयना धरणाचे सहा वक्र दरवाजे ६ फुटावरून ५ फुटापर्यंत खाली आणून २९,१७३ क्युसेक विसर्ग कोयना नदीपात्रात सोडण्यात आला आहे.

कोयना धरण पायथा विद्युतगृहाचे एक युनिट सुरू असून त्याद्वारे १०५० क्युसेक्स विसर्ग सुरू आहे. कोयना नदीमध्ये एकूण ३०,२२३ क्युसेक विसर्ग सुरू झाला आहे.तसेच पावसाच्या प्रमाणानुसार व येणार्‍या येव्यानुसार सांडव्यावरून विसर्ग वाढवला जाऊ शकतो.

धरणातून सोडण्यात येणाऱ्या पाण्यामुळे नदीच्या पाणी पातळीत वाढ होणार असलेने नदी पात्राजवळील नागरिकांना सतर्कतेचा इशारा देणेत येत आहे. तरी नदी तीरावरील गावातील नागरिकांनी नदी पात्रात जाऊ नये. नदी काठावरील ग्राम प्रशासन व संबंधित यंत्रणा यांनी नोंद व उचित खबरदारी घ्यावी.