मराठी शाळाचा कराड पॅटर्न राज्यात भारी : 300 पैकी 200 शाळा सेमी इंग्रजी

ग्रामीण भागातील विद्यार्थ्यांना दर्जेदार आणि स्पर्धात्मक शिक्षण मिळावे, यासाठी कराड पंचायत समितीने मोठा निर्णय घेतला आहे. पंचायत समितीच्या मासिक सभेत जिल्हा परिषदेच्या मराठी शाळांना सेमी इंग्रजी माध्यमात करण्याची मागणी करण्यात आली होती. या निर्णयानंतर अवघ्या एका महिन्यात 100 शाळांनी सेमी इंग्रजीसाठी प्रस्ताव सादर केले आहेत. आता तालुक्यातील 300 पैकी 200 शाळा सेमी इंग्रजी माध्यमाच्या होण्याच्या मार्गावर आहेत. यासाठी पंचायत समिती सदस्य, शिक्षण विभाग आणि अधिकाऱ्यांनी संयुक्तपणे प्रयत्न सुरू केले आहेत.

फक्त शाळांचे माध्यम बदलून न थांबता, विद्यार्थ्यांना दर्जेदार शिक्षण देण्यासाठी तालुक्यातील सुमारे 900 शिक्षकांना इंग्रजीचे विशेष प्रशिक्षण देण्याची तयारीही सुरू आहे. त्यामुळे ग्रामीण भागातील विद्यार्थ्यांनाही इंग्रजी शिक्षणाचा लाभ मिळणार आहे.
नंदाताई यादव, सभापती, कराड पंचायत समिती

खासगी शाळांकडे वाढता ओढा लक्षात घेऊन मराठी शाळांमध्ये गुणवत्तापूर्ण शिक्षण उपलब्ध करून देण्याचा हा प्रयत्न असल्याचे पंचायत समिती सदस्य संग्राम पवार यांनी सांगितले. गावातील शाळाच सेमी इंग्रजी होत असल्याने पालकांनी पुन्हा जिल्हा परिषद शाळांकडे वळावे, असे आवाहनही करण्यात आले आहे.
संग्रामबाबा पवार, पंचायत समिती सदस्य, कराड

कराड तालुक्यातील हा उपक्रम आता राज्यासाठी आदर्श ठरत असून, पुढील वर्षभरात तालुक्यातील 100 टक्के मराठी शाळा सेमी इंग्रजी करण्याचा मानस प्रशासनाने व्यक्त केला आहे.
बिपीन मोरे, गटशिक्षणाधिकारी, कराड पंचायत समिती